蘭桂坊協會主席盛智文(相關)（中）出席「蘭桂坊啤酒節2010」記招，話參加啤酒節唔一定要飲酒，而啤酒節係繼世界盃後一個同朋友見面、相聚嘅好機會。（葉漢華攝）
100個品牌啤酒任飲
今年嘅啤酒節喺呢個月17同18號下晝1點開始舉行，以「炎夏中的綠洲」為主題。參加餐廳、酒吧超過70間，提供30幾個國家，包括德國、愛爾蘭、比利時等超過100個唔同品牌嘅啤酒，到時會有香腸、越南美食同日本串燒畀「啤迷」送酒。
觀眾掌聲選蘭桂坊小姐
今年嘅「蘭桂坊啤酒節小姐選舉」仲會從5個來自世界各地嘅啤酒美女中，以觀眾掌聲選出「最受歡迎蘭桂坊小姐」。
盛智文話，今年佢哋為咗搞啤酒節，投放咗7位數字資金，協會旗下嘅餐廳同酒吧，上半年業績較去年同期增長兩成，佢預期全年增長可維持兩成至兩成半。唔少喺蘭桂坊嘅酒吧就話，世界盃的確對佢哋生意造成影響。好似以音樂為主嘅酒吧The Cavern，喺世盃期間無播世盃賽事，經理Raymond Chu就話﹕「6月最差，生意額較平日跌咗足足四成。」
