啤酒，間間場都係咁賣 o架嘞；價錢，頂盡相差兩三條草；拳手，有就當 Bonus無都唔使 Care，咁點解呢間場咁旺呢？因為有 Heart搞 Function，由世界盃開鑼日開始晚晚玩遊戲，送波衫送啤酒，遊戲唔係一晚玩晒就算，而係派張飛仔畀客人寫低勝負紀錄， Keep住玩足一個月，成功引到客撐足一個月場，呢招真係好醒！世界盃期間，無睇錯仲好似請多咗拳手，有三兩件仲好索吓，加上電視機又多，坐定定唔使兩頭岳，睇得舒服。仲有呀，嗰個鬍鬚經理都好鬼馬 o架，最鍾意同客人吹水搞 Gag：「收到風碧咸今晚落場踢呀，仲要打龍門㖭呀，你買咗英格蘭未呀？未就快啲買啦，捧對家嘅，唔該自己坐埋一邊……哈哈哈，講笑啫。」係有少少爛 Gag，但我受，賽果愛隊英格蘭贏一粒，更加開心。收到風，決賽當晚有終極大抽獎，估中決賽隊伍同波膽，有終極大獎電視機一部，有獎抽有波睇，唔旺有鬼啦。
