呢間喺亞士厘道嘅上樓吧「 Mix」，環境一啲都唔差，地方又大，有個靚仔大廳之餘，仲有長吧頭，亦有 VIP房，多多人嚟都裝得落，加上設備亦齊全，鏢機、卡拉 OK、足球直播一應俱全，撐場唔使輪隊搭，慳番時間飲多杯好過啦！最緊要就係酒水夠抵， Happy Hour一 Set啤酒$78，最平係佢囉， Normal就$198。大酒$680一支，買三送一，又係平過尖嘴唔少酒吧。任飲星期日至四男士$200、女士$150；星期五人多女多搞番晚 Ladies' Night，男士$300無走雞；星期六男$280、女$180，公價唔使格。 Weekend睇波知邊度係好地方啦！
呢個場行嘅係 Clubbing Feel，所以拳手欠奉，不過，靚女一樣唔少，好似熟客 Elena咁，最愛呢度 K歌快又新，問佢平時有無睇開波，佢話：「我都係曼聯 Fans，最想見到就係碧咸回巢，唔好理佢仲有無戰鬥力，返嚟多個精神支柱都好吖。如果未來接埋費 Sir個位咁就最好嘞！」呢啲可能係唔少曼聯迷嘅心聲，不過，如果要回巢，要先搞妥佢同費 Sir嘅關係，話晒都出過書數過人，呢個結都好難解吓！
■ Blue Kamikaze$50
■酒吧夠旺場，一定好氣氛。
■鏢機無論新舊，最緊要係遇上好對手！
（地址：尖沙嘴亞士厘道 27號 2樓）
