解酒妙法之四：心理作怪飲熱茶 Solo

山林道嘅永勝商業中心出名劈場多，每間吧地方唔大，不過勝在拳手多，放工想搵個地方醉番晚就啱晒。特別係 4樓嘅「 Solo」，靚女特多，地方夠簡約，人多可以埋去入面，有個小偏廳；三四知己可以坐矮枱，一樣有梳化靠背，仲有一樣上樓吧特色，就係酒水唔會貴， Happy hour一 Set啤酒$98， Normal就$168；大酒$780支，買二送一。任飲平日男士$200、女士$150； Weekend就男士$250、女士$200，價錢一睇就知平。
最緊要當然係有靚靚拳手，其中 Annie就最好人，肯幫我影靚相之餘，仲肯答我解酒嘅問題，「做拳手周不時都會飲醉 o架啦，不過，就絕對唔會醉到不省人事嗰隻，見自己差唔多醉時就會停手，如果唔係，嘔到甩肺都似。不過，就算無嘔，第二日都一樣辛苦，我自己就會飲熱茶解酒，雖然好多醫生都話熱茶無效，但其實到咗第二日，多數都係心理作怪啫，覺得飲熱茶好就自然有效 o架啦！」講得幾啱，不過，我就唔係話佢飲熱茶啱，而係識得知道自己到頂就唔飲，咁先至醒目，總好過醉到嘔先嚟解酒。