至愛飲歌之三：至愛廣告歌 F-18

早幾日，大班朋友話想蒲飛鏢場，我諗都唔諗提議落「 F-18」。入場，環境的確勁好 Feel，放咗成十部鏢機，部部都有人玩緊，輪到自己掟都會畀心機啲，大佬，掟得差會俾人笑 o架。呢間場飲酒氣氛不俗，中間一排矮枱早就爆晒場，朋友見無矮枱坐都唔願走，寧願齊齊坐吧頭，一樣咁開心。

靚女 Promoter Chole好忙，成晚四圍走，佢仲好 Nice咁有問必答，問佢有乜飲歌，佢好風趣話：「梗係藍妹主題曲啦， I've been waiting for a girl like you...」呢首廣告歌確實 Hit，電視晚晚播，不過有無啲正常啲嘅飲歌？「咁即係玩我啫，我開緊工呀，除咗唱呢首仲可以唱乜先？哈，唔玩你嘞，我首飲歌係莫文蔚嘅《如果沒有你》，超好聽，同朋友唱 K必點！」呢首我都知係好嘢，台灣唔少音樂比賽都有人唱，好想知佢唱成點。講完飲歌，又係時候報酒水，歡樂時光每 Set啤酒$108，正價$188，大酒$680配兩支綠茶或六罐梳打水，講得清清楚楚，飲飽埋單唔會拗數啦。