■呢位叫 Janet，為人 Nice，可惜酒量麻麻，記得手下留情呀！
■ Raymond哥調校嘅 Cocktail，真係可以貓足三個人。
記得以前嘅尖東係不夜城，酒吧、 Disco、波樓、夜總會林立，時至今日，真係遜色得多。但正所謂爛船都有三斤釘，雖然今非昔比，但間唔中都搵到一、兩間好嘢，好似「 Colour」就係一間有齊飛鏢、桌球、老虎機同卡拉 OK嘅夜店，唔係獨沽一味得個劈字。
而且地方夠大，就算成班人走來走去都好鬆動，咁樣除咗唔會有侷促感，仲多咗幾分互動感覺。即係點？即係就算「靶」到方圓幾百呎外有目標人物出現，亦可以扮到若無其事咁行過去玩吓老虎機咁，順便搭埋訕，一切來得幾咁理所當然？
呢個場其實玩 VIP房為主，又係大把空間嗰隻。又有卡拉 OK區、巨型大偏廳畀你玩飛鏢、桌球同老虎機，如果咁多嘢你老哥都話唔啱玩的話，都有辦法，坐吧頭啦，搵首席調酒師 Raymond哥吹吹水又劈劈酒，話咁快又一晚！
■呢個場有唔少熟客嚟 Hea，類似美女都唔少。
■一邊篤波一邊 Drink吓 Wine，至識嘆係你啦！
VIP房多嘢玩
■呢度嘅飛鏢區真係好鬼 Grand，置身其中都好似勁啲咁。
價錢方面， Happy Hour由黃昏 5點開始，至晚９時，幾乎所有啤酒都係$38一支，仲要係買一送一，即係兩兜嘢唔使一支啤酒，絕對 OK啦！
至於 Normal Hour，每支威士忌盛惠$900，買三送一全包宴，圍起上嚟即係六嚿幾水就有一支，尖沙嘴 Standard價啦！
正如剛才所講，呢個場玩 VIP房，所以呢度亦有唔同 Size嘅 VIP房提供，方便大家開各類型嘅大 Party，如果人少少的話，在下提議不如開番間 8至 10人房，玩足全晚， Min pay都係$2,500，每人兩嚿半水就可以唱 K、玩老虎機、飛鏢兼劈埋酒， OK喎；而 10至 12人房， Min pay都係輕輕加多五嚿水，總之就餘此類推……如果真係打算搞大 Project的話，開間 VIP Party房啦， 100人都塞得落， Min pay都係$12,000起錶，除勻條數，根本同去酒吧飲兩 Round酒嘅價錢一樣，但呢度就多嘢玩好多嘞！
■好多靚女鍾意喺度篤波，呢啲場面普通波樓係見唔到 o架！
■懷舊老虎機都有，夠晒 Funny。
（地址：尖沙嘴幸福中心地庫 2-7號）
