■左邊嗰位就係呢個場嘅首席男拳手──文迪。
■呢度嘅客路斯文，大家就住玩嘞！
話明重出江湖，當然不容有失啦，所以我揀咗「 Nirvana」作為出山之地。原因有三：一，呢個場夠晒好氣氛，現場澎湃到你根本無時間再去胡思亂想。二，呢度拳手出名夠兇狠，至怕你唔飲嗰隻，想買醉，真係非呢個場莫屬。三，亦係最主要嘅原因，就係 Waitress夠晒青春省鏡，雖然唔係拳手，但就算齋睇都開心嗰隻。
其實呢度同一般上樓 K吧無乜唔同，都係玩大堂輪唱 K、播吓 Disco歌同掟吓鏢咁，但呢度嘅軟件──人，就份外吸引。想癲想醉，大把拳手排住隊等住挑戰你，如果想玩得輕巧啲，又可以邀請班靚靚拳手合唱一曲，再唔係，搵老闆虎哥掟番盤鏢一較高下，乜都唔使諗，眨吓眼又一晚，做人都係求開心啫，係咪？
■ 11點未到已經飲到面紅紅，呢個場真係幾好劈 o架！
■雖然呢度劈酒氣氛異常澎湃，但都劈得非常斯文。
星期五開 Party
■呢間樓上吧經常維持七成以上嘅入座率，夠晒熱鬧。
呢度除咗有大量女拳手，仲好難得地有男拳手。佢叫文迪，係呢度首席男拳手，不過唔好話唔事前關照一句，搵得佢只有一個下場：不醉無歸。
價錢方面， 3支芝華士優惠價$1,800，咁嘅地段同裝修，價錢絕對係公道啦！如果唔想埋單計數咁麻煩，不如包間 VIP房 Join任飲。平日男士$250、女士$200；假前就男士$300、女士$250。而且開間房，唱 K唔使排隊之餘，仲可以圍埋睇波；又或同班拳手劈個你死我活都仲得。
今個星期五（ 15號）呢度搞「芝華士 Party」，有獎抽又有女媾，至開心就係價錢照舊，喺度預祝大家將會度過一個醉開心嘅夜晚啦！
■掟鏢區幾乎 Anytime都咁熱鬧，夠晒氣氛。
■ VIP房可以容納 30人，圍埋睇波、唱 K一樂也。
地址：尖沙嘴金馬倫道 5號太興廣場 4樓
