■唔知兩位因乜事玩得咁開心呢？受埋我玩啦！
話說，公奇俊上星期專誠去樂道間「 Pub Imagine」探老闆 Tony，點解無啦啦要專登去探佢老人家呢？事關佢就係前 Cyber 8個經理，多年來請我哋飲嘅酒真係翻生愛因斯坦都計唔掂，雖然個場已經摺埋咗咁多年，但正所謂場唔在，人情都在嘛！所以我哋一班豬朋酒友，久不久都會去幫襯吓佢老人家，點知公奇俊好日唔蒲頭，一現身就出事。
出乜事？喺電話裏頭嘅佢係咁講嘅：「我真係中咗招呀！」大人大姐中咩招呀？「我講真 o架！上星期喺 Tony個場遇到個靚女，估唔到就咁……中咗招！」喔，舊陣時公奇俊每個星期最少都中招一次，我都司空見慣見怪不怪，但既然佢出到兄弟牌，我又姑且陪佢癲一次，咪順便當做探吓老朋友 Tony哥囉！
講真，雖然差唔多有一年無嚟過呢個場，但感覺依然良好，除此之外，仲發現呢度嘅質素好咗好多，多咗唔少斯文、年輕、女性座上客，難怪公奇俊話中招啦！驟眼睇，我一晚中幾次招啦！
■呢個場超多呢類勁 Nice又好笑容嘅斯文女打躉。
■ Waitress嘅質素都唔差，絕對睇見都開心嗰隻。
■呢隻就係層層叠香檳，有喜慶至飲 o架！
■飛鏢機絕對係交朋結友締結良緣嘅好幫手。
轉眼搵到新目標
■全場紅色做主調，成個 Mood變得 Very romantic。
講番公奇俊嗰筆，原來佢上星期喺度掟飛鏢時識咗個超班 OL，仲約好今個星期再續前緣，浪漫到連牌都無抄，實行玩不見不散嗰隻，終於……咪影都唔到囉！估唔到公奇俊縱橫夜場、情場多年，都仲可以 Keep到一顆赤子之心，雖然係就係有點失望，但我絕對相信呢種失望嘅感覺只係喺公奇俊內心出現過 10分鐘左右，因為……佢又搵到新嘅目標，並且隨時準備再次中招咁話。有時真係好鬼羨慕佢，易動情又易忘情，世界越來越難測，好似佢咁，得快樂時且快樂咪幾好。
講番個場，呢度主打卡拉 OK，另外當然亦有飛鏢機， Standard酒吧格局，酒水亦唔算貴，飲到貓貓哋斜住走都係兩嚿水左右落樓。
值得一讚嘅係，呢間酒吧唔會好似一般酒吧咁，音樂聲非要調校至震耳欲聾不可，講真，唔係音樂越大聲就越好氣氛嘅。成個場以紅色做主調，睇得出裝修上係花過吓心思，最適合三五知己舒舒服服摸住酒杯底風花雪月一番。
地址：尖沙嘴樂道 27號 1樓
