世盃任睇唔屈特別消費

德國以 4比 0大比數贏阿根廷，身邊啲阿根廷迷無不念念有詞，我都係，但唔係因為愛隊被 out，而係唔高興贏咗我隊英格蘭嘅德國咁得戚，所以，今屆我絕對睇好荷蘭。

■ Dancer的舞跳得勁……身材更勁！

呢度好多靚女嚟睇波兼唱 K，大家識點做啦？

講到睇波，我要套用人家一句：波係成班人踢嘅，當然要成班人睇先夠 Feel，所以今晚德國對西班牙嘅 4強賽事，我會選擇去赫德道嘅「 le.Boss」。
點解間間酒吧唔揀，偏要去呢間呢？無他嘅，又係硬頸脾氣作怪囉！
首先，本人認為世界盃係全世界人都有權利欣賞嘅足球賽事，如果唔係點解叫世界盃？但，身處香港嘅我，就係要折墮到周圍搵地方睇波，而且，仲要俾人限制消費㖭！
其實，落親酒吧兩、三嚿水落樓就預咗，但，如果講到明要消費夠某個數先可以入場睇波，條氣就有啲唔順暢囉！所以，我未來三場賽事都會喺呢間酒吧度睇，因為呢度不設世界盃最低消費或特別收費，照舊任飲價，男士$320、女士$220；再唔係，亦可以逐 round order，每 Set啤酒$210，威士忌全天候$698一支，全包宴，使乜俾人屈貴酒先！

而且，酒價都係其次，德西大戰要成 2:30am先開始，漫漫長夜，梗係要搵間有嘢玩嘅酒吧度過啦！嚟呢度，你可以搵番個索拳手摸住酒杯底 Warm up吓先，你估淨係踢波先要 Warm up，睇波都要 o架！
講多個秘密畀大家知，呢度有個索拳手，佢叫乜名？咪就係叫阿索囉！珍珠都無咁真？有無相睇？ No喇，靚女質素就超班，但，可惜鬼咁怕醜，一拎起部相機就施展凌波微步閃到九丈遠，想見靚女真面目，請親自落嚟視察，睇波順便睇埋靚女，節目夠晒豐富。
拳手怕醜，反而客人就大大方方不避鏡頭，有相為證 o架；又係嘅，靚女怕乜俾你影喎。大家可能又會話，多靚女關我咩事？嗱，當晚我就先點首《我的回憶不是我的》，然後再走埋 Target度問：「靚女，我好鍾意呢首歌，但又無 Partner陪我唱，唔知你介唔介意……」結果點？成功合唱，仲成功……影埋相咯。橋唔怕舊呀，老友！