Big4爭隻腳之六：發夢就有美斯

上星期去嘉芙中心「 S18」，搵一班靚女拳手猜兩板，凳都未坐暖，靚女阿 Dick劈頭第一句就話：「 18號上唔上嚟撐我先？」吓，講到要撐你，你生日呀？「生日就生日，不過唔係我，我哋酒吧 5周年大搞 Function，上嚟一齊 Happy吓囉！」咁快又一年，上嚟有乜着數先？「着數梗有，睇吓你好唔好彩，大抽獎一定唔少得。另外，有 Model、有 Dancer表演，包保睇到你眼仔睩睩，唔眨眼！」咁精采，到時點都要上嚟趁吓熱鬧啦！

■尖嘴大場，嚟呢度睇波包有靚位坐。

講番英超，今晚就開波，呢間場大投射都有兩部，又有掛牆電視，睇波無死位，最正！問埋阿 Dick有無心水球員，佢話：「本來我就最鍾意謝拉特，但家改咗口味，鍾意費蘭度托里斯。講開買人，我睇利物浦都應該無錢做呢樣嘢，有嘅話最好梗係買美斯啦！有佢加埋王子，英超都應該手到拿來。」講就梗係無敵 o架啦，都要有錢同人哋肯走先得，見阿 Dick咁有心機同我吹水，我梗要請佢飲番 Set酒啦！呢度酒水 Happy Hour$120一 Set啤酒， Normal就$198，大酒$780一支，價錢唔算貴，又有靚女同你猜枚，乜都值番啦﹗