挑戰爛玩女經理

靚靚 Promoter駐場，唔需要傷腦筋飲邊隻酒啦！

上星期五，朋友仔司徒帶咗我去一間叫做「 Alto」嘅場玩，呢度有乜好玩？都係一般唱 K、猜枚、飲酒咁……最特別就係經理 BoBo，人唔單止夠晒 Sweet，而且仲非常猜得，聽聞司徒同佢飲到朝頭早八點幾，貓足兩 Days先蘇醒，真係最玩得係佢哋咯！

講起我朋友仔司徒就真係樣衰到出汗，男人老狗飲嗰八、九粒鐘酒就醉足兩 Days，相反嬌滴滴嘅 BoBo經理不但無斜住走，而且第二日 Happy Hour時段就已經喺酒吧蒲頭，絕對猜得、飲得、玩得嚟快回到氣，女流之輩算係好難得，我畀五個叻佢。

■呢杯酒，送都唔敢飲啦！

玩得開心唔爭在
其實除咗經理 BoBo之外，成間酒吧嘅 Staff都咁玩得，就算一個人落去玩，話都無咁易就同佢哋打成一片，當中最 Nice就有靚仔 Bartender表弟，雖然呢位哥仔連財拳都唔識猜，但正正就係枚屎呢樣嘢得人好開心，而且表弟成個酒吧版吳彥祖咁，黐住佢玩唔慌會識唔到女仔，信者得救。

班底講完，接下來要探討嘅當然係價錢問題，呢度喺尖沙嘴酒吧嚟講，價錢算係中規中矩，驚喜就無乜，勝在收費夠穩陣， Happy Hour每 Set啤酒$132、 Normal Hour就加多幾條草，盛惠$198；值得一提嘅係呢個場逢星期日嘅任飲計劃比同區酒吧收得平，男士$200、女士$100就可以劈個你死我活；如果唔想星期日 Family Day都劈酒的話，逢星期一至四嚟都有得 Join任飲 Party，男士$250、女士$100；如果又嫌閒日唔夠熱鬧，咁不如揀星期五晚啦，男士任飲價$250、女士$150，成個老尖都係收緊呢個價；如果係都要揀正星期六晚至出嚟玩的話，價錢就要輕輕畀多少少，男士$300、女士$200，氣氛有時都需要代價，出得嚟玩唔爭在嗰幾條草啦。
其他酒水方面，逢星期日至四威士忌每支$770， Buy 2 get 1 free，星期五、六就買三送一，驟耳聽落真係閒日抵玩好多，總之就各適其適，任君選擇。都係嗰句，玩得開心的話，都唔爭在嗰少少錢。

■嬌滴滴嘅啤酒女郎，我鍾意。