我愛 o靚模之一：邦民女最索 3D

呢排乜都係 o靚模，打開報紙見到娜姐，打開電視見到浸大 Carol，打開雜誌見到百果園 DaDa，仲有甚麼 Donut、新舊 8模，真係齋記名都見暈。 o靚模樣索身材正，男人見到流口水，女仔又點睇呢？「 3D」熟客阿詩話：「有乜點睇啫？咪又係女人一個，事業線長啲咁解之嘛，都唔明班男人點解咁着迷，咁多個 o靚模之中，我覺得拍過邦民廣告嗰個女仔最純，冬菇頭好得意，唔使露肉仲正過周秀娜。」邦民女，即係連名都未識讀嗰個 Anjaylia，確實好可愛，連唔係宅男嘅我都覺得佢好 Cutie。

講番間場，裝修認真唔錯，藍色主調，大梳化係擺得逼啲，但坐到人逼逼先好氣氛吖嘛。入門口，右邊大吧頭，單拖坐吧頭同 Bartender吹水啱晒喇；成班 Friend想玩得私隱啲，大可 Book左邊嘅 VIP房，大電視一部，梳化有埋咕，配多張大雲石茶几，正式卡拉 OK房都係咁上下咋， K-net新歌多，任你唱天光。酒水價 Happy Hour每 Set啤酒$118，正價$188，大酒每支$720，三支$1,880。玩得圍枚一定飲得多酒，建議 Join任飲，星期日至四男$230，女$200，星期五六不分男女每人加多兩條草，唔算超經濟，但落樓一定唔會肉赤咁啦！