■玩到咁癲，受埋我玩得唔得？
言歸正傳，到底邊個場令我玩得咁開心？正係亞士厘道嘅「 Green Pub」。先旨聲明，在下唔見電話係唔關呢個場事，純粹係個人失魂兼論盡喺歸家途中遺失嘅，咁到底呢個場有幾好玩？睇相都見到氣氛好之餘，唔少得嘅當然係玩得又飲得嘅靚女，咁點解呢度嘅女客人咁鬼劈得？哦，好簡單啫，呢晚係星期三 Ladise Night任飲夜，唔使錢喎！仲唔博盡，豁出去咩？
老老實實，成個尖沙嘴幾乎每個場都有 Ladies Night，我都係循例講吓，但真正能夠令我玩到失晒魂嘅原因係──音響。無錯，呢間場嘅音響絕對係我呢半年內去過咁多場之中最正嘅一間，唔好唔記得，呢度係 Pub，唔係打正旗號音響正嘅 K Box。而且，呢度連 Big Four啲歌都竟然有，實在係驚喜中嘅驚喜；大家可能又會問， Big Four個騷年頭已經開，有得唱有乜出奇？大哥，請記住，呢間只係一間樓上 Pub，而唔係乜乜 K呀！
■任飲有個好處，鍾意飲乜都得，唔使就人。
■呢度啲客好 Nice，打成一片話都無咁易。
上 Pub嘆 K
我舉個例，你哋就明我講乜。嗱，早喺上個月，我跟朋友去寶勒巷某酒吧，當時有同行靚女朋友諗住高歌一曲，可惜失望而回，點解？事關嗰間場竟然連鄭秀文隻《罪與罰》都無；諗住唱舊歌啦，又竟然連 Joey隻《痛愛》都無，新唔夠新舊又唔夠舊，你話係咪火都嚟埋？所以，可以喺樓上 Pub，享受咁好嘅 K質素，絕對值得珍惜。而實際代價並唔太大， Happy Hour每 Set啤酒$126，普通時段就輕輕加多幾條草，即係$198；威士忌方面，無論 Black Label定芝華士都係$900一支，嫌貴的話，開夠三支$2,180，慳成五嚿水 o架。另外，剛才提及過嘅星期三 Ladies Night，男士任飲價$250， Standard過 Standard，我接受得到囉。今晚，你知去邊蒲啦！
■呢度地方唔大，就係咁玩起嚟先夠親切感。
■咁多位壽星仔女，生日快「上」呀！
地址：尖沙嘴亞士厘道 23-25號 5樓
