講緊嘅正係位於赫德道有多年歷史嘅「 AT Club」，唔係我認大，真係剛剛出嚟玩時已經有呢間吧，計落十年八載一定無走雞，但呢度就同吧唔同命，除咗越開越旺，仲分店越開越多㖭，除咗赫德道總店，更加分別喺寶勒巷同灣仔開分店，真係至巴閉係佢咯。
言歸正傳，呢間酒吧剛剛同酒商合辦咗場「東洋 Chill模激選」嘅 Party，話就話係選美會，但佳麗同客人之間都有唔少互動環節，事關有份玩先有投入感，夠 Funny嘛。
■專誠由日本飛過嚟嘅「 Chill模」，真係好鬼 Kawaii呢！
樓下吹水 上層鬥劈
■除咗樣靚，身材都好有份量。
格局方面，呢度分上下兩層，樓下係吹水區，即係啱晒啲鍾意拎住杯酒，慢慢傾又慢慢 Drink嘅吹水友 Hea，感覺十分悠閒 Relax，而且超多 OL鍾意嚟呢度傾心事，睇吓大家曉唔曉把握機會；至於樓上，睇個勢都知係劈個你死我活嘅戰鬥格局，除咗有獨立 DJ台，裝修方面用黑色作主調，配上搶眼非常嘅金色佈置，予人強烈嘅對比感覺，而全梳化設計，構成咗大小不同嘅廂座，有私人空間之餘，亦可分享大廳中嘅熱鬧氣氛。
另外， VIP廂座擁有 180度景觀玻璃窗，一覽無遺尖沙嘴嘅夜景，更適合舉行 10至 15人嘅中、小型派對。
價錢方面， Normal hour啤酒每支$35、每 Set就$175；想再抵玩啲嘅話，就不如早少少蒲頭，因為 Happy hour啤酒每支$18、每 Set就$108，埋單計算平成截。至於威士忌方面，芝華士每支$600、黑牌$850，咁嘅價錢有咁嘅裝修配套，我絕對接受得到囉。
■ Promo女郎笑容咁親切，抵我幫襯佢。
■呢度嘅客人，質素真係相當之高。
■樓下嗰層最適合一邊 Drink一邊傾。
■樓上氣氛熱鬧澎湃，可以劈到天昏地暗。
（地址：尖沙嘴赫德道 19-23號）
