我要選視帝視后之二：靚仔大晒 A cup of

平日落酒吧玩，我通常都會去啲無咁嘈嘅地方，因為方便同朋友傾偈玩吓啤牌，所以旺角嘅「 A cup of」不嬲都係我捧場嘅地方。

呢間場除咗可以滿足我剛才講嘅兩種要求之外，仲有部大投射，唱 K睇波都一流，周中歐聯嚟呢間場睇波夠晒舒服。
酒水亦夠平，歡樂時光$118一 Set啤酒，正價就$168；大酒$650。呢啲價錢無投訴啦，所以亦吸引唔少靚女嚟撐場，好似 Emma咁，佢最愛同一班姊妹嚟，而且間中會早啲到，邊飲歡樂時光邊追劇，問佢今年視帝撐邊個？
Emma斬釘截鐵咁話：「梗係林峯啦！我有三大理由話佢贏：一、樂小姐必撐佢攞視帝；二、有錢仔又係無綫契仔；三、靚仔多 Fans，收視有保證呀！」唓，講到尾都係撐人靚仔有家底多過撐佢好戲，咁嘅視帝稱號受之有愧啦！「你唔好理，我覺得九成九係佢，一來家無綫無歌星撐，林峯又唱得，大台一定想捧第二個劉華出嚟，而林峯就係最好選擇！」 Emma講得不無道理，而且視帝始終都係圍內遊戲，邊個掌權就邊個話事！黑暗？老闆頒獎畀員工啫，唔使外人投票 o架。