地上最強之二：圍住個波死守 My DNA

早幾日去旺角登打士廣場飲嘢，發現 23樓有間新酒吧，新場我一向支持，望望招牌「 My DNA」，個名咁熟嘅，原來係舊朋友開嘅。新裝修的確好靚，環境畀到人舒服嘅感覺，有鏢機，又可以唱 K，三五知己嚟飲嘢一定唔錯。酒水方面，歡樂時光$118一 Set啤酒，正價$178；大酒$680，買三送一。唔想散叫有任飲，平日男士$220、女士$180； Weekend男士$250、女士$220。旺角價錢，尖沙嘴嘅高級局格，超值啦！

■爛咗嘅鏢徽唔使掉，儲起佢做裝飾都好靚！

除咗老闆相熟外，發現其中一位靚女侍應朱古力都係舊朋友，有佢當然要影吓相，問吓料啦！「要擊敗巴塞，都唔係難啫，只要用我嘅方式，南華都踢得贏佢﹗」咁有信心？「方法就係動作要快！」 C朗都好快 o架喎，「唔係咁，係一開波時，成隊波十個人要用最快嘅速度圍成一個圈，圍住個足球。咁樣，敵人一定攞唔到個波，跟住只要死守 90分鐘，就一定有和無輸。如果想贏，就要團結，圍圈之餘大家慢慢移動去對方龍門，咁咪入波囉！」雖然唔知佢講笑定講真，我都得啖笑囉！