英超鬥快炒之四：肥安一陣魷魚香 Cash

人總係貪心嘅，落酒吧玩亦想間場多元化啲，但係，香港寸金尺土，啲細場擺得部鏢機就未必整到個 K台，尤其你話尖嘴區舖租咁貴，大場真係無幾多間，又如何搞多元化呢？所以，我至 Like寶勒巷嘅「 Cash」，正因為呢度地方夠晒大，稱得上係同區數一數二嘅大場，大成點呀？可以分到個跳舞區出嚟，仲有大大座 DJ台， Weekend或者人多嗰陣就特別有氣氛。此外，大路設施一應俱全，想睇波可以選擇坐梳化枱或者四方形嘅大吧頭，都睇得好清楚。想郁動吓，當然亦有飛鏢區啦，最新鏢機一早裝定等你嚟；而鍾意高歌一曲嘅朋友，更加唔會失望，可以喺 K歌區過足歌星癮。總之入得嚟，一定啱玩。酒水方面，行任飲制，星期一、二、四男士$200、女士$80；星期三、日，女士之夜，男士$240；星期五男士$220、女士$120；星期六及假前男士$260、女士$200。趁今晚 Ladies' Night，仲唔約人？



■飛鏢區女士都啱玩。


介紹完酒吧，當然要介紹埋靚女啦，上星期就俾我識到阿 V，諗住阿 V斯斯文文，除咗猜枚都無乜好傾，點知佢原來係標準球迷！阿 V：「又輸啦，車路士又輸波，仲要輸畀狼隊，我睇肥安都可以執定包袱做英超一月第一個炒魷嘅領隊！」我都同意，肥安應該聞到魷魚香好耐，不過，我估車仔班主未搵到人頂佢先仲留佢啫！


■梳化大張又舒服，係大場至有咋。



■周末同女士之夜有 DJ打碟，更好氣氛！


（地址：尖沙嘴寶勒巷 26號地下）