■呢位 Waitress，夠晒青春活力。
話說突然收到個 Call，係酒吧老闆阿 Lam搵我，佢話間場換新裝，我咪過去睇吓。原來間場改晒落地玻璃窗，通通透透，出面睇到入面，高透明度夠晒安全，而且有啲 Cyber Feel，同以前舊式酒吧 Feel唔同，多咗年輕人嚟玩，氣氛零舍熱鬧！
挑戰世界高手
阿 Lam話晒係老友，我梗要撐吓場，點知佢話若然嚟到唔見佢，唔使 Call佢，因為佢梗係有啲嘢做，家呢度係後生仔世界，可以搵佢個姪阿鋒喎。後生仔果然有衝勁，佢話改咗新裝修，嚟緊仲有好多新嘢，除咗基本嘅睇波，又有大堂 K唱，仲新加咗兩部鏢機，家咁興，梗係唔少得啦！阿鋒仲話：「咁都未算，遲啲會有最潮、嚟自日本嘅『 Hi-Star鏢機』，可即時同全世界連線，上網挑戰世界各地高手。」嘩！咁好玩，又真係有睇頭喎。
■佢哋真係熟客，熟到兩姊妹齊齊嚟捧場。
■新一代「揸人」同靚女 Waitress合照吓先。
玩比賽贏獎金
阿鋒講開唔停得咁：「呢度由四月份開始，就有好多唔同節目同比賽，好似派對同埋飛鏢比賽，贏咗會有現金獎 o架。」咁就真係抵玩喎，隨時酒錢賺番。而且唔同嘅派對或節目會每個月搞兩次，真係有誠意 o架。
不過，呢間場就無拳手，咁都唔奇嘅，咁多嘢玩，都唔使靠拳手吸引人啦！但我發現，一樣有青春美麗嘅 Waitress喎。而且由於裝修轉咗「透視裝」，好多女仔都覺得安全感大增，多啲嚟玩。唔信？嚟到你就知有幾多斯文靚女客 o架嘞！
■家咁興鏢機，呢度直情起個孖啦！
■改裝後真係幾得，即時旺番晒。
Sixty-Eight Pub
地址：沙田大圍積福街 68號金輝樓地下
歡樂時光（ 17:30-20:45）：啤酒$42/支（買一送一）
正價：啤酒$168/半打（ 4 Set送 1 Set、 7 Set送 2 Set）
威士忌$688/支（全包、買 3送 1）
