歐聯八強之六：南華我就睇 Me Too

要數尖沙嘴最有品味嘅酒吧，不得不提漆咸圍嘅「 Me Too」，講門面夠大夠氣派，講環境裝修夠高尚格調，嚟過就知氣氛特別好，加上酒吧無話擺枱擺到密質質，空間感夠，自然畀到人 Relax嘅感覺。娛樂設施亦齊全，有 Online鏢機玩，又有拳手，飲天光都無問題。要特別一提嘅係，呢度周不時都有 Function搞，嚟緊 4月就有靚女歌手鄭融同人氣組合 Mr.嚟表演，撐場早到啦﹗


介紹完酒吧，當然要搵靚女影吓相先啦，今日就俾我抄到靚女 Kiki牌，問吓靚女點睇歐聯 8強，佢就好平靜咁話，「無留意喎，都唔明啲人點解咁鍾意睇波，廿幾人追住個波踢嚟踢去都唔知為乜，最好笑又唔係自己國家或城市出賽，你話南華或者香港隊，我都會望兩眼電視嘅。睇波不如猜兩板好過啦！」 Kiki呢個答案都好正常，女士唔鍾意睇波都係天經地義嘅，等我即刻報埋酒水同佢猜兩板。酒水價錢，歡樂時光$98一 Set啤酒，正價$216，大酒軒尼詩$980，簡單易記又公道。自問飲得到嘅，可以面議做任飲一樣抵。



■擺枱唔逼，空間感足夠，抵讚﹗




■室內設計精緻，格調獨特。




■ 4月 1日有星嚟表演，撐場早到喇。




■有兩部 Online鏢機，點會悶呢？


（地址：尖沙嘴漆咸圍 9-9A號地下）