我愛o靚模之七：至少睇得開心 2001水手吧

其實諗諗吓啤酒同 o靚模都有共通點，啤酒好多人都覺得佢苦，但係就有好多人鍾意飲；而 o靚模就人人話佢哋行為過火，但係就好想睇吓佢哋嘅新聞仲有乜可以搞。
兩者似唔似，都係我個人觀點啫，不過「 2001水手吧」嘅 Yuki就話，娛樂版有佢哋好過無：「有時睇吓啲 o靚模都幾好，有身材睇，又有得笑吓佢哋；而且，無佢哋做新聞，啲娛樂版真係少咗好多嘢睇，與其炒作其他嘢，得啖笑咪好囉！」

咁又係嘅，養眼又搞笑咪幾好，好過睇新聞版啲不公平社會現象。呢期邊單新聞令我哋啲低下階層咁勞氣？唔使講，大家都心照啦！都係飲吓啤酒好過，你知啦，醉咗，大晒吖嘛！又係抵我醉嘅，呢間吧酒水夠抵， Happy hour都係$96一 Set啤酒， Normal hour就$152，平到笑；大酒仲$650一支，呢啲價錢相信都好難搵到第二間。設備方面，鏢機梗有啦，而且酒吧攞過唔少飛鏢錦標，高手一定有；再唔係三五知己猜枚唱 K，都一樣開心，正所謂一醉解千愁，乜嘢勞氣都無晒啦！

■長長大吧頭，最啱睇波啦。