尖沙嘴可以話係本地最多上樓吧嘅地區，開完一幢再開第二幢，數數手指都有成 8、 9幢，而寶勒巷 10號可以話近期最新同最旺嘅一幢上樓吧，而位於 5樓嘅「 Los Angel」，地方雖然唔算大，但氣氛十分好，走斯文 Clubbing場路線，室內佈置以深色為主打顏色，配上金屬珠簾在各大窗前，甚有私家 Party氣氛；另外，有一間可容納 15-25人的 VIP房，朋友多又想玩放啲一定要嚟試吓。其他設備方面，有足球直播、 K-net最新 K歌。酒水價，星期四為女士之夜，女士免費，男士$300任飲。 Happy Hour時段啤酒$120一 Set， Normal係$198，大酒一支$780全包 Mixer。拳手好客，猜枚助興，隨時候教，絕無冷場。
講完靚場，諗住搵靚女影相啦，點知拳手個個怕上鏡，無計，好在有靚女熟客阿 Sue夠好人，甫士左擺右擺都無 Say no，做好人做到底，梗係問埋佢邊支英超愛隊啦，「我最鍾意阿仙奴，好彩費比仔最尾無走，不過都唔明點解唔買番個好龍門。好似上年，明明有幾場贏波變輸波都係因為龍門出事，咁都唔諗吓，係咪唔對路先！不過，之前睇新聞，好似話想搵基雲，我覺得都係一個唔錯嘅選擇，雲格放心畀錢買人啦！」
■埋邊仲有個小偏廳，十幾人都夠坐。
■窗邊有金屬珠簾，別具格調。
■唱 K就梗係要有大電視啦！
■酒吧以深色為主，甚有 Clubbling Feel。
（地址：尖沙嘴寶勒巷 10號 5樓）
