又嚟哈囉喂之三： VIP房啱開P Ignite

仲有幾日就到哈囉喂，大家有心水地方開 Party未呢？未嘅話，今日介紹可能啱你心水都未定。銅鑼灣區自從無咗大利行後，上樓吧好似分散咗好多，好彩仲有耀華街呢個上樓吧旺區，其中嘅百樂中心有間「 Ignite」，環境無得彈，大廳有多張梳化枱，有大大個靚靚吧頭，亦有 Online飛鏢區，單係啲配套已經唔失禮。特別一提，呢度有兩間 VIP房，上樓吧地方細好少有咁奢侈嘅設備，每房各自容納到 30人，值得一讚啦！

嚟緊哈囉喂，酒吧早就佈置好場地搞氣氛，一出門口就有個猛鬼屠夫同你打招呼，再望望天花板，成盞蝙蝠吊燈就嚟跌又未跌咁款，都幾嚇人！最特別係酒吧為配合萬聖節，準備咗大批可愛南瓜杯，飲嘢夠晒 Feel。攞支筆抄低唔該， 10月 30同 31日晚呢間場都會搞 Party，想邊日玩悉隨尊便。酒水方面，大時大節當然係任飲價啦，男士$350、女士$300，哈囉喂周圍都係咁嘅價錢，唔覺特別貴亦無話特別平，想撐場唔該趁早訂位，手快有手慢無呀老友。