又嚟哈囉喂之二：成間鬼屋咁 La lavande

今年哈囉喂，想搵間有氣氛嘅酒吧玩，首選呢期尖沙嘴人氣最盛嘅「 La lavande」，早幾日我落場睇過呢間場嘅裝飾佈置，一出已經勁有萬聖節 Feel，恐怖核突公仔當然唔少得，最有心機係全場都掛晒白布，感覺成間鬼屋咁，經理仲話：「你早到咋，其實仲未裝飾晒呀。」嘩！家都咁大場面，完成晒所有後期製作咪唔得了？抵你做尖沙嘴人氣王酒吧。
至於當晚活動，當然離唔開扮鬼化妝同派小禮物，最正係有 DJ Tony駐場打鬼魅音樂搞氣氛。咁多嘢玩嘅代價係男士$320、女士$220，講真價錢同平時閒日差唔多，所以，我估 30同 31日呢兩晚一定爆到瀉，早啲 Book定位穩陣。

■記得坐吧頭，因為係識靚女好地方。

其實呢間場唔止哈囉喂至熱鬧，平時逢星期二嘅「女士之夜」一樣爆晒場，皆因女士免費任飲，自然吸引唔少靚女幫襯。咁多抄牌機會，男士入場費$320實在抵畀。另外，逢星期四搞「 Deep V」之夜，女士入場必然着 Deep V，而每位男士入場都會派一張貼紙，覺得邊位女士着 Deep V着得夠索又省鏡，就可以畀張貼紙佢，投佢一票，勝出嘅 Deep V女神有$1,000現金，幫補番化妝靚衫費，又係盞啫。