拳手要醒目之一：埋枱 Timing啱啱好 JJ Live

早前尖沙嘴有不少酒吧結業，連出名有 Live Band嘅「 CD Bar」都無埋，不過，最近行過舊址，又發現新開咗間酒吧叫「 JJ Live」，梗係要落去啦，發現店內同之前有好大分別，多咗不少 VIP房，另外，最正嘅 Live Band依然 Keep番，每逢星期一至六都會有 Live Music，所以話好嘢一定有人識欣賞，睇見呢間場仍然人山人海就知啦！加上酒水又唔係貴，歡樂時光都係$98，正價時段就$178，大酒$800一支， 3支$1,800，尖沙嘴區算係平囉！

除咗 Live Music，呢間場仲有拳手可以同客人猜兩板，其中靚女 Coby真係人見人愛，我貪得意同佢玩幾鋪啦，問到 Coby做拳手最緊要係乜？「梗係要識睇時間啦，我唔係指放工時間，係同客人坐低猜枚嘅時間，有時兩三個客坐低，見佢哋無乜嘢講，呢個時間就最啱嘞。不過，如果見佢哋講嘢講到指手畫腳，或者喁喁細語講秘密咁款，就唔好舂個頭埋去，人客會覺得你唔識做，阻住晒，咁樣嘅話，一開始就唔想同你玩，咁就最唔醒目嘞！」