數歐聯歐霸精采之六：車仔返晒嚟帆船吧

周中又有多場歐聯大戰，最多人講就梗係里昂對皇馬、國米對拜仁、馬賽對曼聯啦！我都捱咗幾晚通頂呀！真係年紀大機器壞，睇幾晚波就要唞番兩日先得，所以今晚星期六先至復出，由於仲係好疲，所以唔係好想飲咁醉，呢個情況就梗係揀我至愛的「帆船吧」啦！

呢間吧畀我感覺唔錯，斯斯文文，大班人嚟 Clubbing又得，三五知己嚟劈酒亦得，座位又舒服，坐低真係唔願走。另外又有 K唱同飛鏢機，而我最愛都係坐喺大吧頭，一邊試 Cocktail，一邊同 Bartender吹吓水。咪睇 Bartender阿珊係女仔，佢講波經一樣掂，阿珊：「車仔嗰場你有無睇呀？不知幾勁，平時踢到頭耷耷嘅車仔，好似上咗身咁。不過，咁都啱嘅，喺家除咗歐聯佢都無乜好寄望，一定搏啦！」所以話呢，人真係不可貌相，點睇阿珊都唔係足球 Fans，傾開先知大家都有話題，一於同佢大談波經。講之前都要報埋酒水先，歡樂時光$120一 Set啤酒，正價$198，大酒$680； 10位以上有任飲，男士$250、女士$220。除 Bartender阿珊外，仲有靚女拳手同大家猜兩板，求醉又好，嚟 Relax吓又好，都係一個好選擇﹗