數歐聯歐霸精采之十三：期待阿巴大戰 Bar Pacific IX

早幾日一大班朋友去黃大仙食飯，飯後，大家一時興起又話要去飲酒。坦白講，黃大仙有無酒吧我真係唔知，就算知都無乜信心，點知住呢頭嘅朋友拍晒心口話放心，既然係咁就跟佢走轉啦！唔啱咪轉場囉。直至行到門口，老友指指店名，吓﹗原來又係「太平洋」？估唔到黃大仙都有，呢間係九號分店「 Bar Pacific IX」，咁就自然放心入去玩啦！品流一定唔複雜，又唔使擔心俾人呃酒水，事關全線公價 o架嘛，我都識得背價錢咯，歡樂時光$20一支啤酒，正價$30支，大酒$680一支，有收多記得同我講﹗


環境方面，大廳全梳化，另外有長吧頭；設備方面，卡拉 OK、足球直播樣樣有。嚟呢度睇歐聯都係唔錯嘅選擇，大投射睇波一定爽，加上連靚女侍應都識講吓波經，增加睇波樂趣， Carmen：「家最期待就梗係巴塞主場對阿仙奴啦，一來巴塞務必先追回一球，二來兩支都唔係防守型球隊，一定大打對攻波，下星期一定超精采！」我諗唔止 Carmen同我，相信大家都好期待，所以唔使講，約定老友到時再嚟呢度飲酒睇波，有興趣嘅到時見啦！

放大圖片

■ Blue Pacific
$48


放大圖片

■酒吧雖然唔大，不過一樣有吧頭照顧我哋呢亭單身人士。


放大圖片

■大廳舒服又有大投射，睇波唱 K一樣好氣氛。


放大圖片

■埋邊仲有個小偏廳，人多啲都坐得落。


地址：黃大仙鳳德道 31號地下