呢度雖然地方細細，但就經常旺爆，上星期五去到我都呆咗，真係好多人，而且枱枱唔係一 Set啤酒飲到尾，而係紅酒、威士忌，唔貴唔嗌！老友 Raymond見我出現，即時過嚟搭訕：「我哋出名酒水平，全場老友覺得抵飲自然賞面！」佢唔係吹水，歡樂時光$98一 Set啤酒，正價亦只係$168，大酒$680，話晒尖嘴場，咁嘅水位好難做到。
環境方面，有露天枱亦有室內梳化，最緊要當然有足球直播啦，唔少熟客嚟搵 Raymond齊齊睇直播 o架， Selina就係其中之一，雖然係 Lady，但對足球一樣有研究：「我係 AC米蘭 Fans，雖然歐聯輸咗一球畀熱刺，但我一啲都唔擔心，一來近期 AC腳風順，二來熱刺傷兵太多，到佢主場贏番兩粒有幾奇！」足球係圓嘅，當然係踢過至知，一於約定 Selina下星期齊齊飲酒兼睇波！
放大圖片
■老闆 Raymond老友特別多，唔怪之得酒吧咁旺場啦！
放大圖片
■露天吧一樣坐滿人。
放大圖片
■大路啤酒外，仲引入一啲少見嘅牌子俾大家試吓。
放大圖片
■有鏢機、有卡拉 OK，仲有足球直播，設備齊全。
（地址：尖沙嘴漆咸圍 1-3號多福大廈地下 A座）
