維港夜景無遮擋　浪漫情調識靚女囂 Cocky Bar

越來越覺得世界上絕大部份嘅嘢都係掌握唔到，明明正值失戀之痛，但就成日神推鬼擁我去一啲浪漫到爆嘅地方，講緊嘅就係位於 The One嘅「囂 Cocky Bar」。

■靚場配靚樣，夫復何求？

講真，我都算係見過吓世面，就算蒲到去上海所謂一等一嘅 Grand場，都唔會好似大鄉里出城咁嘩嘩聲，但當我第一次踏足呢間酒吧嘅時候，實不相瞞，我真係好似細個第一次睇煙花時咁「嘩」咗出聲，嗰種震撼真係非筆墨可以形容。事關呢度唔單止居高臨下位處於 18樓，最煞食係個可以坐擁 270度維多利亞港嘅海景大露台，東方之珠嘅美景盡收眼簾。
雖然呢一刻嘅我剛剛甩拖，鬼咁傷心嗰隻，但當睇到咁 Grand嘅璀璨燈火，你會發現世界真係好大，無咗一棵樹又何足掛齒，仲有成個森林等緊你，高矮肥瘦任君選擇，大丈夫何患無女？淨係呢個場已經大把教人滿心歡喜嘅選擇，怕乜？
雖然呢度嘅客人質素相當唔錯，但有樣嘢必須 Remind大家，就係嚟到呢度，千祈唔好當自己身在一般拳手劈場咁；簡單啲講，要斯文啲又莊重啲，失禮街坊就唔好啦！
大家又可能會問，斯文場有乜好玩呀？哎呀，其實乜嘢類型嘅場都有其好玩之處，問題係你 Tone唔 Tone得啱個 Beat而已，就好似呢度咁，想識女仔真係易過借火，事關呢度個 View真係靚到無話可說，十個上嚟嘅人十個都會情不自禁影低到此一遊。

■無遮無掩維港夜景，四個字可以形容：百看不厭。

■淨係睇個吧頭嘅設計，已經覺得個場夠晒 Grand。

星級服務斯文場
「小姐，可唔可以幫我影張相呀？」如果對方問你，點解唔搵身邊朋友代勞？你又可以理直氣壯咁答：「佢飲到貓貓哋，手又震，影唔到咁 Grand嘅夜景呀！」我相信咁認真嘅解釋，絕大部份靚女都會接納。
講番間酒吧，呢度嘅服務水準亦係夜店難得一見之好，基本上在我而言已到達六星級酒店質素，呢啲咪就係叫人使錢都使得冧囉。價錢方面，一杯 House紅酒唔使一嚿一杯，既然有酒店級數嘅享受，畀番中環區嘅價錢都係合理嘅。