■呢位就係靚女芝，真係樣靚身形正
■兩位拳手最厲害就係可以 20秒吹完一支啤酒，堅！
既然靚女芝開到聲，我當然樂意去捧場，而呢晚嘅捧場腳就搵咗司徒秋生，點解呢位仁兄個名咁搞鬼？原本佢個名叫司徒，但因為佢個樣生得同黃秋生有 80%相似，所以咪索性叫佢司徒秋生囉！孖住佢落吧玩有好多好處，就係坐喺隔籬左右啲靚女都會成日眼望望我哋，三九唔識七都會走埋嚟撩傾偈：「咦，你個樣好似黃秋生呀！」係呀，好多人都咁講 o架！「你係咪佢親細佬嚟 o架，邊有咁鬼似？」你陪我玩幾鋪骰盅，我就話畀你知。得咗。
講番芝經理個場叫「 Club Zero」，位於旺角信和側嘅 15樓，地方夠晒寬敞闊落，所以芝經理每晚都要帶成十幾個拳手，辛苦晒咯！雖然拳手夠晒多，但就大部份都唔肯俾我影相。點解，鬼咩，十一點未夠就一隻二隻飲到關公上身咁──塊面紅晒，梗唔肯影相啦。唔好以為佢哋有酒膽就一定好飲得，事實係未到凌晨時分已經超過半數拳手俾人 KO──貓咗。令我諗番一個廣告，不過，喺呢度就變咗喺 15樓嘅貓貓！
■呢隻就係喺 15樓嘅貓貓拳手─阿 Black喇。
■拳手阿妹，生得咁可愛，邊忍心隊貓佢？
15樓變貓貓
■呢 Set Shooters，飲完即暈，敢唔敢試？
拳手晨早就貓貓，咁咪無嘢玩囉？咁又唔會，呢個場逢星期一同星期五都係 Ladies Night，女士們只要着短裙入場的話，全晚任玩任飲價$1，吸引啩！但如果不幸天生一對甲組腳，唔想獻醜，亦有大可以$88入場費，任玩任飲全晚，講真，呢個價都比唔少場平一大截，絕對接受得到啦！
男士方面，無統一入場收費，由星期一到星期日都係 Order幾多就 Pay幾多，夠均真。 Happy Hour每 Set啤酒$98、 Normal就$198； Black Label同芝華士每支$880，買二送一，又係抵飲。上樓吧就有呢個優點，酒水價格普遍比地舖平三分一，行多幾步都值得嘅。
■飛鏢區夠晒寬敞，擺埋甫士都夠地方啦！
■呢個場真係超級大，靚女識唔晒。
地址：旺角彌敦道 580G-K號彌敦中心 15樓（信和中心側）
