「咁又未必，」「 Club Zodiac」靚女拳手 Apple搶住答，「雖然利物浦贏唔到，但佢被人迫和都係意外，證明本身有能力打敗阿仙奴。另外，今年走咗個垃圾領隊賓尼迪斯，隊波正常番，一定可以踢高半班先啦！加上謝拉特、費托，成班波又唔係渣，如果齊心嘅話，攞英超冠軍都唔係無可能，一於博佢哋打番年爭氣波！」唉，要爭氣，早兩年班底仲強啲嘅時候，就開始爭啦。見 Apple咁有憧憬，都唔打擾佢自我陶醉。
■全場裝潢夠體面，帶朋友嚟飲嘢一啲都唔會失禮。
都係介紹番間酒吧先，嚟過玩嘅朋友都知道，呢間屬高級 Clubbing場，環境夠豪華，唔失禮，全場用上大大張梳化招呼客人，唱 K就有大投射，想掟鏢又有兩部鏢機；而且，嚟玩嘅都係斯文客居多，最啱大班男男女女 Clubbing傾吓偈。酒水方面， Happy hour一 Set啤酒$132， Normal就係$198；大酒$850支，三支$1,880。任飲方面，星期日至四，男士$250、女士$200；星期五、六，男$280、女$220。望住諾士佛臺靚景嘆番杯，我就好啱 Feel嘞。
■時下酒吧鏢機又點少得呢？
■ Orange Road$58
■小食燒魷魚必食之選，$48。
■大投射放正廳中間，想唱 K，識搵位坐啦。
（地址：尖沙嘴諾士佛臺一號 5樓）
