英超冧巴溫之六：估係曼城啩

成日有人問我，想掟鏢去邊個場好玩？其實鏢機就間間大同小異，所以真係有心想磨練吓飛鏢技術，就應該去啲有高手出沒嘅地方，當然高手無樣睇，所以大家可以留意吓該間酒吧有無飛鏢隊；有的話，可以問吓 Bartender，佢哋幾時會落嚟練習。好似「 Aqua」呢度，就有一隊飛鏢隊，好多時都會喺星期五出現，當然你自己真係有番咁上下技術先好挑戰人，如果唔係，分分鐘請人掟鏢貴過飲酒。

講完掟鏢，又係時候講吓英超邊隊最掂，影靚女，呢度不乏靚女拳手，不過，個個都鬼咁怕醜，好彩仲有靚女熟客 Lisa喎。佢話：「睇波我都唔係好識，但要我估，就估係皇馬啦，有 C朗！」皇馬係西甲 o架，靚女。「咁就瑞士啦！」瑞士係國家嚟 o架喎！「都話唔識 o架啦，咁曼城得唔得？」終於俾你撞中，咁叻女抵請你飲番杯。

■ Lisa掟鏢麻麻哋，等我嚟教你啦。

雖然 Lisa無講曼城點解係冠軍，不過，我覺得都係唔好問，我驚佢話有高比仔邊有得輸，咪大劑。所以都係講吓酒水好過， Happy hour啤酒一 Set係$128， Normal就$188；大酒$680，買三送一。想任飲，最好入嚟面議，你知啦，任飲嚟講，啲人飲 Whiskey都無要求，想飲好啲就最好講明畀人聽。

■呢度勁有掟鏢氣氛，而且啱啱仲贏過比賽㖭！