我愛 o靚模之四：有得睇無蝕底 Hill

「 Hill」唔算係我主場，但每次撐場都唔會失望，好多次仲飲到嘔先捨得走，因為班唔肯上鏡嘅拳手人靚枚精，十五二十固然唔夠佢哋閃電手咁快，連大話骰都唔夠佢哋技高運高。無計啦，爭人錢唔爭人酒，飲死罷就啦。好彩，喺未醉之前，我老早捉定 Promoter Fanny講兩句，佢話：「 o靚模寫真買就唔會嘞，有得睇都會睇兩眼嘅，靚女有好身材， Show少少有乜所謂啫，我唔覺得有幾傷風敗德囉。人哋都係搵食求上位啫，又唔係打家劫舍，唔畀佢哋入動漫節直頭錯晒啦。我覺得百果園 E神最正，樣純，身材又好，咁多男仔鍾意好正常。」呢啲就係人話嘞，咁都話禁，禁托高樓價好過啦！
講番間場，上樓吧地方唔細，一出就係大堂，梳化位坐得舒服，吧頭夠大夠醒神，側邊有部鏢機畀你手痕露兩手；側邊有個小偏廳，人少啲無咁嘈；想玩得私隱啲，大可 Book間 VIP房，最低消費自己同老闆 Deal，價錢公道唔會放你血，唔做羊牯放心做酒鬼。