西甲鬥一番之二：巴塞開大格 Bar East I

上星期，四大聯賽因歐國盃外圍賽，所以要讓一讓路，不過睇西班牙隊大炒列支敦士登一場，就睇到巴塞實力有幾強！點解？成隊西班牙由前鋒到後衞都係巴塞嘅主力，而巴塞嘅其他位置，就由世界級球星美斯等代替，地上最強確係實至名歸！難怪連女士睇巴塞踢波，都覺得係賞心樂事。好似「 Bar East I」嘅熟客阿 B就最 Like巴塞，「睇佢哋踢波有組織，又有個人突破，時短時長，對手撲來撲去先最慘。呢隊波入球有保證，場場都入到兩、三球，呢啲先係現代足球吖嘛。」咁又係，巴塞場場都咁有水準，真係追住佢買大或總入球都有着數。
講完西甲，介紹埋間吧，雖然喺土瓜灣，唔算旺區，但都有唔少熟客，所以平日或周末都咁好氣氛；特別係掟鏢，酒吧有成立自己鏢隊，更贏過不少比賽，睇佢一個個獎盃放晒出嚟就知有幾巴閉啦！所以，嚟得掟鏢嘅人都有番咁上下技術。唔鍾意掟鏢，都可以嚟唱吓 K，揀歌用 Touch screen，咪問人家攞遙控咁老土呀！酒水方面， Happy hour一 Set啤酒$118， Normal就$178；大酒$588。想任飲可面議，平日十位咁多，大概男$180、女$150，人多就梗係傾吓無妨啦！