「我撐皇馬，今年冗員走晒，又加入唔少年輕有鬥心球員，有鬥心至係致勝關鍵。加上，今年有摩連奴教皇馬，我對呢隊波更加有信心。巴塞雖然強，但亦唔係攻唔破 o架，好似上年摩連奴教嘅國米就擊敗咗巴塞，證明呢個教練有計點贏巴塞；而睇番上年，巴塞同皇馬勝負關鍵在於皇馬兩場主場作客輸晒畀巴塞，少咗 6分，好大分別 o架喇。希望今年摩連奴教可以一吐烏氣，冠軍誰屬，真係要睇兩隊對賽先知！」
嚟緊就有西甲比賽，姑且睇吓皇馬係咪可以贏番場波爭吓氣啦！其實，除咗睇波，平日都可以嚟呢度搵 Winvy飲吓酒，咪睇佢個樣咁 Cool，查實佢都幾搞笑，而且求其一個爛 Gag佢都笑一餐；仲有樣嘢睇唔出，就係佢識整 Cocktail o架，好唔好飲？自己嚟試吓咪知囉。我都係報埋酒水先， Happy Hour一 Set啤酒$118， Normal就$178；大酒$680一支，四支$1,980，夠晒街坊價啦！
■靚女整嘅 Cocktail，幾難飲都要試吓啦！
■ Emma Special$48
■吧頭旁邊有鏢機，邊飲邊掟玩成晚。
■酒吧設計夠簡約，加上坐得又夠舒服。
（地址：土瓜灣道 293-295號地下）
