鳳凰鏢機玩法之七：鬥高分夠挑戰性 Color

自己好少落尖東一帶飲嘢，最近朋友介紹我去一間喺幸福中心叫「 Color」嘅酒吧玩，又確係幾正喎，大廳全場大梳化之餘，仲有多間 VIP房，房間可容納十至六十人不等，其中大房認真超級豪華，單單呢間房嘅面積分分鐘大過唔少上樓吧，而且設備齊全，多部大電視加 K-net俾你唱歌外，仲有張美式波枱任玩，另外，有鏢機外，更有難得一見嘅波子機，咁齊全嘅設備，老實講，我蒲咁耐吧，都真係少見。如此環境，酒水又唔算貴噃， Happy Hour啤酒$38支，買一送一； Normal就$38支；大酒$900，買三送一，抵啦！
講番今期主題，呢度一樣有最新嘅鳳凰機，一於問吓靚女客人 Annie有乜好介紹先，「最好玩就梗係掟「 Over」啦！除咗鬥高分外，仲要鬥準繩，有難度 o架。玩法係大家先掟一個分數，之後就掟對方差距，例如 150對 169，咁即係第二 Round時 Player1要掟高過 19分先過關，如果 Player1總共掟到 22分，即 172，咁 Player2就要掟高過 3分先有分加，餘此類推，去到第十 Round邊個最高分為之勝出！」明唔明？唔明上嚟玩吓就明晒 o架喇。