其實家市面上有兩種 Online鏢機，一種只可以跟日本同本地連線，而鳳凰機就可以日本、韓國、香港三地 Online比賽，單係咁睇就知鳳凰機比較 Hit啲啦！當然，啲 Game好唔好玩都好重要，好似今日介紹嘅「開寶箱」咁，雖然舊版鏢機都有，但就無 Online玩，同埋畫面無咁靚。至於點玩，勞煩靚女 Promoter家嘉介紹吓，「玩法好簡單，畫面有 7個寶箱，代表 7個數字，大家要試掟不同數字，如果掟中，寶箱就會打開；不過，打開咗唔等於屬於你，你要掟中三次至屬於你，例如掟三個 Single、一個 Double加一個 Single，或一個 Triple，都可以取得寶箱，最尾邊個多分就係贏家。最緊張之處在於當你開到但未攞到寶箱，對手依然有機會搶到嘅，所以無番咁上下技術一 Round搶到寶箱，好易俾人捷足先登就慘 o架喇！」
■掟到 180分就可以榜上留名。
講完玩法，介紹多個好正嘅掟鏢場畀大家，就係「 Tempo」，呢間吧喺藍馬嚟講算係大場，地方夠大，鏢機唔少，最啱愛好掟鏢嘅朋友，掟中 180分仲可以榜上留名，有證有據，同人講番時唔會俾人話你作嘢。酒水方面， Happy Hour一 Set啤酒$120， Normal就$192，買三 Set送一 Set；大酒$888買二送一。任飲方面，平日男士$200、女士$150， Weekend就男士$250、女士$200。
■新舊鏢機一樣有，想掟鏢邊隻都一樣可以。
■寶箱有 7個，不過就要撞屬於邊個數字。
■最快取得圓圈就表示搶到寶箱。
■地方夠大，張張大梳化都擺得落。
（地址：尖沙嘴厚福街 12號藍馬商業大廈 3樓）
