西甲鬥一番之七：西維爾夠專注 Metal Bar II

連續訪問咗咁多人，幾乎人人都講皇馬同巴塞，成個世界真得呢兩隊波玩晒？「 Metal Bar II」靚靚拳手詩雅就唔係咁睇，佢話：「我睇好西維爾喎。」都好獨排眾議吓喎，點解呢？「西維爾年年都係黑馬 o架啦，今年仲有樣嘢好，連歐聯都出埋局，可以專心踢西甲，少條戰線戰績一定好。」好似好熟行情咁喎，「係呀，我男友話我知嘅。」男朋友？唉，即時無心機佢抄牌！不過好彩，呢間場仲有大把女仔客，一於逐枱 Say個 Hi先。
講番間場，典型玩氣氛格局，唔少都係熟客，個個都飲到面紅耳赤，九成枱都玩到嘈喧巴閉，咪以為淨番嗰一成好靜局，唔出聲全因鬥緊地主，盤口仲玩到好大呀！我自問猜枚唔叻，鬥地主亦好水皮，都係搶支咪唱歌仔好過，再唔係射吓鏢機，又係好 Hea啫。好 Hea有價， Happy Hour每桶啤酒$108，正價$168，大酒每支$680買二送一，超平抵飲，抵撐場啦！