廿八蚊夠啲乜之四：買零食送酒 Busy Pub

昨日介紹過佐敦其中一間酒吧，今日介紹多一間同樣喺佐敦新開無幾耐嘅「 Busy Pub」。雖然係上樓吧，但地方一啲都唔細，仲要全場靚梳化，又有兩部鏢機、卡拉 OK供大家娛樂，硬件娛樂齊備。酒水方面，歡樂時光$98一 Set啤酒，正價時段$168；大酒$688，買三送一。任飲方面，星期日、一男士$180、女士$50；星期二至四男士$180、女士$100；星期五六及假前男士$250、女士$150。飲得起嘅 Join任飲一定抵，又唔使逐次計錢咁煩。至於女士就更抵飲，所以吸引不少靚女客人幫襯，今次我就一次過識咗四位嘞，包括 Wendy、 Joyce、 Vicky同 Tracy，佢哋都係呢度嘅熟客，影相、問兩句都大方應承，問 Wendy畀廿八蚊佢會做乜，「唔使講，梗係即刻落便利店買花生、薯片上嚟送酒啦，啤酒最佳伴侶就係花生同薯片，你話係咪先？」係就係，不過就唔會買到好多囉，最多都係一包花生兩包薯片，分分鐘買得零食嚟又唔夠畀酒錢喎。