至愛飲歌之五： Order完酒話你知 Hero Club

最近有間新酒吧叫「 Hero Club」，前兩晚撐場發覺好熱鬧吓，大堂 U形梳化全部坐滿人，矮枱擺滿一桶二桶啤酒，人人飲到面紅耳赤，左邊一枱猜十五二十嘈到嚇死人，右邊一枱靜靜哋玩緊鬥地主，我八卦偷聽，嘩！兩杯底無限炸，一個炸彈搭多個火箭升空，做莊輸咗即飲八杯，你都咪話唔激！行入啲有個小偏廳，靚女們大唱私房 K，老實，歌喉好一般，但勝在唱嗰個夠投入聽嗰個識畀面拍掌。一句講晒，成間場勁好 Feel，非常之今朝有酒今朝醉 Mood。

■酒吧乃新酒馬諦氏主場，梗係有靚女 Promoter啦。

數全場最忙，一定係 Promoter阿 Mi，但見佢枱過枱，拎酒又斟酒，真係有氣無碇唞。趕交差，幾忙都要捉佢影番張相，佢人 Nice無詐型。問佢邊首係飲歌，佢叻咯，居然咁答：「我大把飲歌，嗱，不如咁，你幫我 Order番支酒，我再慢慢唱畀你聽，好唔好？」 OK，你咁答，我咁樣照寫啦。
酒水方面，話晒老尖場，始終 Happy Hour早早蒲頭有着數，每桶啤酒$138，分分鐘仲平過太子酒吧街，正價$210，合理水位嗰隻，大酒每支$780買二送一，鍾意飲大酒的話，不妨一次過幫襯阿 Mi買兩支，兩支價錢有三支大酒，均除每支$520，足足慳$260一支 o架，都係嗰句，飲唔晒就留酒啦，下次飲過囉。鍾意一個價飲到尾亦得，任飲禮拜日至四男士$220，女士$180；禮拜五同六男士$280，女士$200，邊個 Plan抵啲，自己識揀啦老友。