聖誕好禮物之五：賣出 1萬支酒 New Parrot Pub

今年聖誕睇勻咁多間酒吧主題，十間有九間都係玩吓抽獎，講真只證明一樣嘢就係經濟唔好，大節出嚟玩嘅人都少咗，換轉早幾年前，抽獎梗有，兼且有 Model Catwalk或者比堅尼女郎火辣桌上舞啦！至於邊間場嘅獎品至吸引呢？個人就最鍾意「 New Parrot Pub」嘅禮物嘞，係 Wii周年紀念版一部，而且除咗 24號平安夜有得抽之外， 31號除夕又送一部，大時大節，抽中都幾開心 o架。另外，酒吧仲請嚟白雪公主同聖誕老人到場大派禮物搞氣氛，咦？聖誕老人就合邏輯啫，白雪公主關咩事呢？不過無所謂啦，都係想大家開心啫。

■獨立梳化，坐得幾舒服 o架！

至於當晚酒水價，男女任飲都係位位$350，由太子行到尖嘴都係咁上下，一年一次俾人賺吓都應該。何況，呢度有大量拳手同你猜枚，又有靚女 Promoter Moon為你送酒，即使平日嚟都咁好玩。講開靚女，順便捉住阿 Moon問佢想要乜嘢聖誕禮物先，「我唔貪心，淨係希望節日期間賣到一萬支酒啫！」吓，咁即係 24至 26呢三日，平均每日要賣 3,333支，會唔會難度高啲呀！「高就梗 o架啦，但我會朝呢個目標努力嘅，加上有你幫手宣傳，一定得！」嗱，大家嚟到識做啦！