去舊迎新之一：垃圾領隊必炒 Luxe

話咁快 2010年即將過去，有時人生又真係好似踢足球咁，今年運滯唔等於下年都係，積極啲操 Fit自己，一樣有運行，而一隊球隊上半年踢得唔好，下半年開波前咪檢討吓，睇吓有乜瘀血就清清佢咯。做人都係咁之嘛，最緊要識反省，以後盡力做好自己。好似英超咁，瘀血多的是，連「 Luxe」嘅靚女 Vincy都識講：「講瘀血就梗係利物浦嘅鶴臣，睇佢帶波開季衰到家，無場好波，你話球員渣，但都未至於衰到咁，一定係領導惹的禍啦，炒得！」相信 Vincy嘅意見大把人贊成，包括我。

講完波，又到介紹酒吧時間。太子酒吧街呢一年多咗唔少清吧，係咪好玩當然見仁見智，但個人始終偏好有拳手嘅酒吧，起碼唔使剝花生咁 Dry先吖，而呢間「 Luxe」就啱晒我要求嘞，環境亦夠晒靚仔，長方形格局，座位夠舒服；又有大電視，嚟睇波一流；鍾意劈酒，就更加 OK啦！唔信可以大除夕嚟玩吓，就知我無呃你！酒水都係大圍價，男士$350、女士$300任飲，早啲到，飲到 High High哋，倒數仲好 Feel。