■一睇呢位拳手個樣就知佢係豪飲一族，大家打定牛油底。
眾所周知，拳手幾乎係香港酒吧嘅獨有文化，呢期唔知係咪講得嘢太多，唔係咁想講嘢，所以最好就係落漆咸圍嘅「 M-PLUS」，事關只要 Order一 Set啤酒，就一定有拳手埋嚟陪你傾個夠本又猜個痛快，連撩女仔嘅說話都可以慳埋，咁先為之係出嚟飲酒嘅真正 Relax嘛！
三間吧靈活調動
點解一諗到想搵拳手猜枚，就自自然會諗起呢間酒吧？當然喇，呢間係有酒吧皇后之稱嘅 Van仔旗下嘅一間場， Van仔姐之所以能夠成為酒吧皇后，全因為佢出名多拳手，講到囡囡呢個題目，你估個個都可以稱王？如果係嘅話，我都可以做酒吧皇帝，而唔係家嘅酒吧蝗蟲啦！
鍾意嚟呢個場仲有另一原因，就係唔止拳手面口夠新鮮嫩口，數量仲出奇地多到得人驚，保守估計，如果逐個拳手嚟同你猜一 Set的話，相信飲到貓晒都未見得勻所有拳手。係咪咁誇張？在下絕無誇口，因為 Van仔姐喺漆咸圍同柯士甸小路呢兩條街加埋已經有成三間酒吧，隨時抽調拳手，就係呢種靈活嘅經營方式，所以在下絕對有理由相信，飲到貓都未必見得晒全部拳手 o架！唔似得有啲吧，全場得嗰一兩個拳手，成日要同人哋爭，咁樣樣出嚟玩，你話幾無癮先。
雖然呢度好落本，拳手可以車輪轉咁同你猜個唔停，但酒水價錢都係維持喺一般尖沙嘴 Standard水平，每 Set啤酒$228就有交易，唔想飲到成肚水，搞到要頻頻幫襯茅廁的話，在下提議不如豪少少開番支威士忌，無論芝華士定 Black Label都係$850一支，慳慳哋嘆吓嘆吓，夠兩、三條友 High住玩成晚喇！
如果閣下覺得呢個價口好似高咗少少的話，咁就不如早蒲早着，因為呢度 Happy Hour每 Set啤酒$120，足足平 Normal Hour一半咁滯，講緊嘅都係同一杯酒，梗係慳得一蚊得一蚊啦！
■斯文 Feel嘅拳手，唔知大家又啱唔啱睇？
■呢度嘅 Promo女郎都幾賢良淑德 Feel。
■成班老友圍埋掟吓鏢，一樂也！
■呢個場長期咁旺，拳手應記一功。
地址：尖沙嘴漆咸圍 1-3號地下
