太子好玩吧　 Promo Girls索到暈太子廊

在下有個老友記叫阿成，咁啱最近又搬咗去東涌度住，所以成班豬朋「酒」友都開咗佢一個玩笑，就係齊齊改口叫咗佢做東涌成，事關呢位朋友仔自從搬咗去老年咁遠度住，幾乎已經絕迹江湖，一代劈酒梟雄從此殞落，可悲也。

■兩位 Promo Girls絕對唔係見慣見熟嗰幾張面孔，夠晒新鮮感。

雖然東涌成已正式退隱，但凡事都有例外，就好似上個星期五晚，東涌成就好鬼例外咁出現喺通菜街嘅「太子廊」，原因係呢間酒吧嘅得意妹經理阿青牛一之喜，咁嘅大日子，佢老哥就算真係貓咗返唔到屋企，瞓街都要嚟捧場啦！

斯文妹長 Hea
大家係咪好想知道經理青點解咁有 Face？可以令絕迹江湖半年嘅東涌成東山再起？全因阿青出名猜得飲得又 Wet得，直情係人見人愛、車見車載嗰隻，抵我哋成班豬朋「酒」友都咁撐佢。而且，呢間酒吧除咗阿青之外，幾位駐場拳手都好得人歡心，雖然有時就扭擰咗啲，極都唔肯上鏡，但我就係欣賞呢班囡囡夠晒性格，要見佢哋嘅廬山真面目，就唔該稍移玉步落去酒吧 Hea番轉喇！

獨立房睇波掟鏢
雖然呢間酒吧有好玩得嘅經理，又有好飲得嘅拳手，但真正最令在下暈得一陣陣嘅，其實係班 Promo Girls，唔講大家可能唔知道，嚟得呢間酒吧做 Promo嘅女仔都特別有質素，唔信？有相為證到你哋唔信？真係件件都索到啪啪聲。除此之外，呢個場都有唔少斯文妹長 Hea，唔使多講，都係嗰一句：有相為證，包無老點。
軟件就 O晒 K嗰隻，咁硬件又如何呀？呢間酒吧本身玩大堂 K，想唱歌的話就真係要行上個無敵 K台唱，絕對可以滿足到閣下嘅表演欲；如果唔鍾意唱歌的話，唔知睇波、掟鏢又啱唔啱閣下嘅心意？因為呢度有間獨立房係專 For波迷同鏢迷盡情睇波、掟鏢之用，優點係就算大堂唱 K嗰位唱到如何不堪入耳都好，房內嘅人一啲都唔會被影響到，玩得夠晒盡情盡興。
價錢方面，雖然無乜驚喜，勝在夠晒 Standard， Normal Hour唔使兩嚿水就有一 Set啤酒，幾乎成個太子區都係做緊呢個價，個人嚟講就絕對無投訴。