嗱，今日介紹嘅係「 Viva」，佢位於旺角，交通好方便，地方亦夠大，我最鍾意係呢度嘅佈置，上牆彩色波波燈，未到聖誕已經好好 Feel。設備方面，新加咗 Online鏢機，又有舊式機，無論你係貪新定念舊都一定有得你玩！酒水方面，行任飲制，星期日男士$150、女士$50；星期一女士之夜，男士$250；星期二至五，男士$180、女士$100；星期六男士$260、女士$150，心水清又蒲開呢頭嘅朋友都應該知，咁嘅水位算係全旺角最平 o架喇。另外，亦有拳手同你猜兩板，不過怕醜唔肯上鏡，惟有搵 Promoter阿 Cat影相，「聖誕係 Sell酒旺期，我哋梗係無得放假啦；不過，如果有假放，我最想去浸吓溫泉，大陸又好、台灣又好，日本都無問題！」阿 Cat你都識講啦，幾枱客都等你啲酒，你都係唔好發夢，忙完先去玩啦！
■新舊鏢機都有得掟。
■呢個雪人公仔真係好鬼靚！
■未到聖誕，已經好有聖誕氣氛！
（地址：旺角西洋菜街 1號兆萬中心 14樓）
