■靚靚駐場歌星除咗聲音，份人仲相當 Nice。
大家未必經歷過八十年代酒廊嘅興旺期，但都可能聽過當年嘅酒吧歌星大多歌藝、諧趣兼備，經典例子就有酒廊歌后朱咪咪，咪咪姐唱得又識搞笑，但外形所限，唱情歌當然就畀唔到咩幻想空間啦；而呢間酒吧嘅駐場歌星，真係個個都人靚歌甜嗰隻，唔好以為班靚女得個樣，佢哋唱功都有一定水準 o架，而且全部擅長唱最新嘅情歌，飲大兩杯，望住台上嘅佢哋大唱冧歌，真係好容易代入，好易被電暈，小心、小心！
呢邊冧歌嗰頭睇波
■呢度嘅客路以年輕 OL為主，玩得放而又不失斯文嗰隻。
軟件絕對係 Very OK嗰隻，咁就講番酒吧嘅硬件。雖然打正旗號以音樂做主題，但始終位處銅鑼灣商業地段，所以唔多唔少都要滲入少少商業元素，即係播放多個頻道嘅足球賽事囉！呢頭聽完抒情冧歌，嗰頭又可以欣賞刺激嘅足球賽事，真係好鬼有冰火 Feel。仲嫌唔夠刺激？亦可以搵幾個拳手埋嚟片番幾 Set，係咪好鬼節目豐富呢？
另外，呢個場最近由 7:30pm開始，增設客人上台唱歌時段，唱 K就無乜特別，特別在於有琴師即席為閣下伴奏，感覺好似返番去卡拉 OK未興起嘅年代，久唔久咁癲一癲都幾好 Feel o架！
■大家話呢位 Promo女郎個樣係咪有幾分似吳雨霏呢？
■根據非正式估計，呢度真係女性客人較為多，大家準備好未呀？
包保啤酒夠凍
■ Live Band現場開騷，令你完完全全感受到音樂嘅震撼力。
價錢方面，呢度個水位可以話係 Standard過 Standard， Black Label每支$800， Order三支就$1,800有交易，平均每支平咗兩嚿水，飲唔晒可以留酒，下次嚟飲過。
除此之外，在下仲有一個開心大發現，就係每 Set$220嘅啤酒，喺 Happy Hour（ 7:30pm-9:00pm）竟然只係賣$120，又係平成一嚿水，但味道同份量就一模一樣；最抵死係 Happy Hour Last Call可以無限量留酒，即係話就算一次過 Keep起十打啤酒都得，而且期間會 Non-stop為你加冰，包保啤酒飲到打烊時分都係咁冰凍，但就無留酒服務，即係 Order幾多都無問題，不過要即晚清數，絕對公道。
■行過門口，已聽到現場樂隊嘅澎湃音樂。
地址：銅鑼灣謝斐道 415-421號地下
