「香港第一有鬼用咩！」「無名島」靚女 Alice搶答。聯賽第一都無用？我就真係唔明嘞！「計我話，香港應該組一隊球隊加入中超，一來可以訓練香港精英球員，二來可以靠中超嘅名氣，相信吸引到觀眾入場，好似英超一個城市支持自己城市隊波咁，咁至可以令香港球迷有投入感！」 Alice咁講真係講中我心聲，相信每個球迷都想擁護自己城市的球隊，而 Alice呢個方法最好不過，咁以後買波衫就唔使買人哋國家嘅球隊，買屬於自己嘅香港隊。
如果真有呢日，我一定會嚟「無名島」同 Alice飲住酒再講波經，講番酒吧先。酒吧共分地下及閣樓兩層，下層最啱睇波猜枚，上層就裝有兩部鏢機，完全係一個飛鏢區格局，人夠多又好掟鏢，一大班人就好似包咗間 VIP鏢房一樣。酒水方面，歡樂時光啤酒$36支．買一送一；正價$168一 Set。大酒$638，酒水平到笑，就算人多嚟玩，都分分鐘兩嚿水都唔使，抵撐！
■啤酒價係成條街公價。
■酒吧仲有兩款生啤供應。
■閣樓裝修成個飛鏢專區咁款。
■地下大廳睇波猜枚最啱用。
（地址：太子通菜街 214-216號地下及閣樓）
