交叉介紹　識朋友慳水慳力 la la Club

最近發現唔少朋友都不約而同去咗泰國度假，避寒咁話。嘥氣啦，其實想避寒使乜嘥埋晒啲機票錢，香港好多地方都係無冬天 o架啦，邊度？咪就係遠在海邊、近在眼前嘅尖沙嘴、中環囉。事關呢兩區係 Disco嘅集中地， D場不嬲都係熱辣辣，如果唔係，班靚女點可以短裙襯背心仔呢？真係睇到我都好鬼 Hot呀！

■呢個場時不時都有啲咁省鏡嘅 Promo女郎 o架！

■格局同裝修， Standard Clubbing咁囉！

今日要介紹嘅就係金馬倫道嘅「 la la Club」，雖然呢間係上樓 Clubbing場，但條排隊入場嘅隊龍，比起喺正隔籬嗰間又係經常大排長龍嘅壽司店，真係不遑多讓。全因為呢度嘅經理少爺 Ben無嘢多，就係兄弟姊妹多，而且十居其九都係型男索女嗰隻，都話，呢個世界都係物以類聚，就連做朋友都一樣。
講番少爺 Ben，佢份人真係好玩到無話可說，在下夠膽講，呢個場一半或以上嘅人都係因佢而來。點解肥肥哋又型型哋嘅佢會咁鬼受客人愛戴？全因為佢老哥出名簽酒特別闊綽，尤其飲大兩杯，更加係簽酒唔留手嗰隻，咁都未止，佢仲最鍾意將佢啲朋友「交叉感染」……唔係，應該係交叉介紹先真，即係點？即係佢會將一班齋女朋友介紹畀另一班齋男嘅朋友，好處係幫大家慳番唔少開場白，時間都慳埋，好過上網亂結交啦！

■女 DJ個樣咁 Sweet，難怪播嘅歌都咁冧。

■逢星期二晚嘅 Ladies Night真係旺到插針唔入。

一個價錢玩到尾
配套方面，呢度有三間 VIP房，分別可容納 10-15人、 20-30人，同埋 40-50人。收費方面，不設最低消費，照舊人頭計：星期一、三晚男士$250、女士$180；星期四晚就男士$320、女士$70；星期五、六就係咁意貴少少，男士$320、女士$220；至於星期日都 OK抵玩，男士$250、女士$150。總之無論坐房定玩廳，都係一個價錢玩到尾，方便利落。
特別一提，星期二晚係 Ladies Night，女士免費入場任飲任玩，而男士都唔算要付出太大代價，同星期五、六一樣都係任飲價$320。價錢好似水蛇春咁長，其實好簡單。
最後值得一提嘅係，呢度有靚女 DJ坐鎮，大家咪睇佢斯斯文文吖，打嘅歌一樣咁勁 o架。