上星期尖沙嘴最多 Function搞的酒吧「 M&M」又有 Function，今次主題聽落都有啲頭，叫「哥哥年年廿五歲」，未入去仲以為邊位大哥慶祝生日，點知睇到 Set晒舞台，擺晒架生就知原來係音樂 Party，仲要全晚大唱「哥哥」張國榮啲歌，好唔好睇？我淨係知全場氣氛勁 High，觀眾反應答晒大家啦！呢間酒吧一向多鬼主意吸引客人，加上基本條件一啲都唔差，自然客似雲來。呢度面積約 2,000多呎，樓底特高，大廳感覺開揚，採用大玻璃窗嘅設計，座位全部梳化，逢星期一至六晚上 10:00至凌晨 1:00更有駐場琴師為大家獻技。酒水方面，歡樂時光$128一 Set啤酒，正價$198；大酒$730三送一。當然你亦可以揀任飲， 10位以上起，男士$300、女士$200； Weekend就男士$350、女士$200。
靚女方面，熟客又有拳手一樣有，阿 Sue唱 K好得，令人聽出耳油， Winnie十五二十、財拳樣樣精，問到靚女知唔知邊個基士文？阿 Sue：「南華新外援，聽講就好勁，不過，我就唔知堅定流，仲話今日上場比賽，睇吓晚間新聞南華贏定輸，就知係咪大家講到咁掂囉！」
■咁大塊 Banner「哥哥年年廿五歲」仲唔似祝壽牌?!
■入場仲有夜光棒，好似紅館睇 Show咁有 Feel。
■ Live Band伴奏，大唱「哥哥」名曲，佢哋唱到咁賣力，值得拍掌！
（地址：尖沙嘴漆咸道南 11-15號余仁生中心 2樓）
