呢個場由以前嘅「 D吧」到喺家「 Clubbing吧」，都係行高格調路線，燈光偏暗而帶有少少紅光，勁有 Feel，枱與枱之間距離夠寬闊，坐得舒服之餘，講嘢大聲啲都唔怕俾隔籬偷聽。仲有，不停播住最新外國 MV勁歌，有時真係忍唔住想跳吓舞；再唔係可以行去飛鏢區，有新款嘅 Online鳳凰鏢機，娛樂設備 OK啦！
酒水方面，歡樂時光$136一 Set啤酒，正價就$216，大酒$880，咁好環境都抵番。
靚女方面，我搵咗最猜得嘅阿 May，由發財到鬥地主，佢統統都曉，唯一唔精嘅就係飲酒，大家記得高抬貴手，讓吓靚女嘞！問到阿 May有無睇波，佢話：「英超梗有睇啦！我估最快落馬一定係車仔嘅肥安嘞，睇車仔嘅近績同以前真係兩班波，以前覺得佢天下無敵，但近幾場俾人感覺好似成日唔係輸就係和。俾你做班主，都會諗吓郁人求變啦！」
■吧頭夠大，坐喺度同 Bartender吹水夠正啦！
■環境偏黑，但格調一流，勁有 Clubbing Feel。
■飛鏢區自成一國，方便又玩得專心。
■咁靚嘅酒櫃，連我呢啲蒲精都唔多見。
（地址：尖沙嘴漆咸圍 9號地下）
