講番間場，我敢講全條赫德道呢間場最豪，分兩層，下層有鏢機加梳化枱，至啱三五知己吹水掟吓鏢；上層密密麻麻擺滿方枱，有駐場 DJ打碟，有波播波、無波播 MV，氣氛一流。
如此好環境，酒水一啲都唔貴， Happy hour每 Set啤酒$120，正價$195；大酒$750。自問千杯不醉半點紅嘅話，歡迎 Join任飲，一 Set翻本、兩 Set賺凸，周日至四，男$250、女$150；周五、六，男$280、女$200。信我，大路老尖價，包你無詐型。新春期間，擺滿獅頭、財神、兔仔、炮仗等賀年飾物，記得帶定相機，大把影相位呀，老友！
■樓下嘆生啤、掟飛鏢，清靜寫意。
■酒吧甚有新年 Feel，啲擺設仲好靚喎。
■想飲生啤，一樣款式夠多，總有一款啱你口味。
■一樓最適合猜枚同唱 K，周不時爆場，氣氛一流！
（地址：尖沙嘴赫德道 19-23號地下及 1樓）
